Министерот за здравство, Азир Алиу, денеска ги увери стоматолозите да бидат спокојни, бидејќи министерството ги презело сите потребни чекори за да се обезбеди континуитет во лиценцирањето и ре-лиценцирањето. Според него, овој чекор е правилен и навремен, бидејќи во спротивно, до септември или октомври, речиси половина од стоматолозите би останале без лиценца.
Без застој во процесот на лиценцирање
Алиу информираше дека од денеска, сите апликации за лиценци може да се доставуваат до Министерството за здравство. Тој потпишал решение со кое Секторот за стоматологија, заедно со вработените од Комората, ќе има обврска да ги процесуира сите барања.
Министерот потенцираше дека на овој начин нема да има застој во процесот, туку дека ќе се воведе ред и ќе се работи согласно законите.
„Ќе се погрижиме стоматолозите да имаат лиценци што се валидни, а од друга страна, да бидат сигурни дека пациентите ќе добиваат услуги со квалитет“, заклучи Алиу.
