Претседателот на ВМРО-ДПМНЕ, Христијан Мицкоски, на вечерашниот митинг во Струмица порача дека градот е подготвен за промени, по две децении, како што истакна, заробеност од една „фамилија“ и затворен круг на луѓе и фирми.
„20 години Струмица чекаше на промени кои, еве, ви велам дека ќе се случат. Кога ве гледам во овој голем број, знам дека тука ќе победиме. А ќе победиме затоа што Струмица крева глава, се ослободува од стегите кои две децении ја заробија во она што се вика фамилија која го запоседна градот“, рече Мицкоски.
Тој ја обвини власта дека ги заробила надежите и иднината на граѓаните, додека тие се богателе на грбот на струмичани.
„Ја заробија во еден затворен круг на фирми, луѓе, поединци и бизниси кои живеат на грбот на струмичани. Тие станаа милионери, народот остана сиромашен. Тие градат згради во Дубаи, народот остана разочаран“, истакна Мицкоски.
Според Мицкоски, од Струмица со години се воделе најголемите зделки што ја уништувале Македонија и политичките комбинации што ја оставиле државата заробена.
„Ова е градот на гуруто на Филипче, човекот кој ја симболизираше целата таа мрежа на криминал, корупција и лични интереси“, рече тој.
Мицкоски го критикуваше и кандидатот на СДСМ, Венко Филипче, тврдејќи дека тој доаѓа во Струмица за да „земе инструкции од Заеви“, а не за да понуди визија.
„Нè убедуваа дека ова е непобедливо упориште на СДСМ, дека тука нема промени. Но времињата се менуваат. Дојде денот кога тие ќе паднат, а народот ќе победи. Струмица ќе победи“, заклучи Мицкоски.
