Премиерот Христијан Мицкоски во гостување на ТВ Сител изјави дека со здружена акција на институциите, состојбата со пожарите на депониите е ставена под контрола, и покрај тоа што ниту една од нив не е под надлежност на централната власт. Тој ги обвини опозицијата и активистите блиски до СДСМ и ДУИ за ширење на немир и невистини.
Трубарево: Мицкоски истакна дека пожарот, кој експертите предвидуваа дека ќе се гаси најмалку 7 дена, е ставен под контрола за помалку од 30 часа. Четири лица се приведени и им е одреден притвор. Параметрите на загадување, според него, не се животозагрозувачки, а опозицијата се обидува да внесе немир кај граѓаните.
Вардариште: За оваа депонија, која постои повеќе од 5 децении, ангажирана е агенција за обезбедување на периметарот, а за приведените лица е одреден притвор.
Дрисла: Премиерот очекува во наредните денови целосно да се реши проблемот со чадењето, кое веќе е намалено за околу 95%. Во врска со одговорноста, околу десет лица од раководството на депонијата се повикани на информативен разговор. Мицкоски најави дека ќе се испитаат тврдењата дека опремата во време на пожарите била на сервис, а вработените земале боледување.
Министерството за животна средина издало наредба до инспекторатот за вонредна контрола на сите депонии со лиценца. Ако се утврди дека не работат според законот, дозволите ќе им бидат одземени. За чистење на дивите депонии одговорни се општините.
Мицкоски нагласи дека сите случаи ќе бидат истражени и дека „ако некој мисли дека ќе помине неказнет, тогаш се лаже“.
