Претседателот на Владата, Христијан Мицкоски, во своето обраќање по повод 24 години од постоењето на Централниот регистар, ја истакна институцијата како столб на македонската економија. Тој потенцираше дека Централниот регистар е природен дел од владината визија за правна држава, силни институции и модерна јавна администрација.
Мицкоски нагласи дека изградбата на ефикасна администрација базирана на дигитализација е процес што бара време и визија, а Централниот регистар е одличен пример за тоа. Според него, со своето работење, оваа институција создава услови за подобра економија и стабилност на државата.
Премиерот истакна дека Централниот регистар, со своите дигитализирани услуги и експертиза, е клучен промотор на бизнисот и старт-ап екосистемот. Тој посочи дека институцијата се вградува и во европските стандарди за транспарентност и борба против перењето пари и финансирањето на тероризмот.
„Решенијата што ги создавате денес служат не само на граѓаните и на компаниите, туку и на државата и меѓународните партнери, правејќи ја Македонија позитивен пример во регионот и пошироко“, рече Мицкоски.
Тој најави дека оваа институција е највисоко рангирана според евалуациите на Министерството за јавна администрација, што е доказ за нејзината посветеност и иновативност.
На крајот, Мицкоски упати честитки до раководството и вработените, охрабрувајќи ги другите институции да го следат нивниот пример.
