Министерството за образование и наука (МОН) објави повик за наставници од средните училишта да се пријават за напредна обука за примена на вештачката интелигенција (ВИ) во наставата.
Обуката, насловена „AI во училница“, е наменета за наставници со основни дигитални познавања и добро владеење на англискиот јазик. Целта е да им се помогне на наставниците да ја интегрираат ВИ во сите фази на наставата, од подготовка на часови до оценување.
Јавниот повик е објавен во соработка со групацијата „Брејнстер“ (Brainster).
Пријавувањето трае до 12 септември.
Селекцијата и тестирањето на кандидатите ќе се одвиваат до крајот на септември.
Обуката започнува на 1 октомври.
Наставниците што ќе учествуваат ќе добијат бесплатен пристап до 8 курсеви месечно, со најсовремена и практична содржина. За успешно завршување на курсевите, тие ќе добијат дигитални сертификати, а за целата програма и печатен сертификат. Обуката ќе ја водат инструктори со меѓународно искуство.
Соработката меѓу МОН и „Брејнстер“ е резултат на потпишан Меморандум, со што се реализираат институционалните заложби за воведување на вештачката интелигенција во националниот образовен систем.
