Случајот што ја потресе јавноста во Демир Хисар добива нова, драматична димензија. Иако Основното јавно обвинителство (ОЈО) Битола издало наредба за претрес на три локации во случајот со кривичното дело „Фалсификување и уништување деловни книги“, за директорката на средното опшинско училиште не постоела никаква наредба за приведување. Оваа информација фрла сериозна сенка врз постапувањето на началникот на ОВР Демир Хисар, кој е обвинет дека „на своја рака“ се обидел да ја приведе жената и да се иживува со неа. За среќа, благодарение на брзата и професионална реакција на адвокатот Жарко Стеваноски, обидот бил спречен.
Според информациите од ОЈО Битола, законската процедура за добивање наредба за претрес е целосно испочитувана. Барањето за претрес на службените простории на училиштето, домот и автомобилот на пријавеното лице било поднесено до Основниот суд Битола, кој го одобрил. Целта била да се обезбедат предмети поврзани со кривичното дело.
Меѓутоа, од ОЈО Битола изјавиле дека во рамките на овој случај немало издадено наредба за приведување или итен распит на лицето. Ова јасно укажува дека обидот за приведување на директорката е направен без законска основа и без соодветна наредба од обвинителството, со што се отвора прашањето за малтретирање во служба и злоупотреба на службената положба од страна на началникот на полицијата.
Дополнително, и покрај спроведените претреси, обвинителството сè уште не е официјално известено за евентуално пронајдени и одземени предмети. Ова дополнително ја комплицира ситуацијата и ги засилува сомнежите за некоректно постапување.
Овој инцидент го потенцира проблемот со самоволието на поединци во институциите. Јавноста со право очекува одговорност и истрага за обидот за приведување на директорката без наредба, а надлежните институции треба да дадат одговор на прашањето дали началникот ги пречекорил своите овластувања.
