Советничката листа „Независни за Прилеп“, предводена од носителот Иле Бачанов, излезе со емотивна и силна објава во која ветува спас и возобновување на ФК Победа Прилеп, која ја нарекува „душата на Прилеп“ и „симбол на градот“.
Листата остро ја критикува досегашната негрижа на локалната власт, посочувајќи на „празни ветувања, запуштени терени, блокирани сметки и целосна незаинтересираност“.
„ФК Победа не е само фудбалски клуб – тоа е душата на Прилеп, дел од нашата историја, нашето име и гордост! Но денес, овој симбол на градот е доведен до раб на исчезнување. Доста беше од молк!“, се вели во објавата.
Пет точки за спас на клубот
Независните за Прилеп претставија јасен план во пет точки за стабилизација и враќање на клубот:
- Општинско тело за спас: Формирање тим составен од Општина Прилеп, поранешни фудбалери, спортски работници и навивачи, со задача за стабилизација и возобновување.
- Транспарентен фонд: Создавање финансиски фонд под општински надзор, во кој ќе учествуваат јавните претпријатија, локалните фирми и граѓаните.
- Реконструкција на стадионот „Гоце Делчев“: Обнова на стадионот преку модел на јавно-приватно партнерство и општинска координација, со цел Прилеп да добие современ фудбалски дом.
- Младинска академија „Победа“: Воспоставување систем за развој на млади фудбалери, за децата повторно да го сонуваат црвено-белиот дрес.
- Враќање на навивачкиот дух: Организација на спортски манифестации и општински настани за да се врати масовната поддршка и љубовта кон Победа.
„Ова не е само спортски проект – ова е план за враќање на градската гордост. ФК Победа е симбол што не смее да згасне! Прилеп без Победа не е Прилеп“, заклучуваат Независните, повикувајќи ја Општината да застане зад клубот.
