Израелскиот премиер Бенјамин Нетанјаху го одбил барањето на францускиот претседател Емануел Макрон за посета на Израел, објави израелскиот јавен радиодифузер Кан. Одлуката доаѓа пред очекуваното француско признавање на палестинската држава подоцна овој месец.
Макрон, наводно, сакал да го посети Израел пред Генералното собрание на Обединетите нации, каде што се очекува Франција, заедно со други западни земји, да ја признае Палестина.
Сепак, Нетанјаху ја условил посетата со повлекување на Макрон од плановите за признавање на Палестина, што францускиот претседател го одбил.
Макрон на 24 јули најави дека Франција ќе ја признае Палестина како независна држава, наведувајќи ја како причина сè поочајната ситуација во Појасот Газа. Тој посочи дека официјалното признавање ќе се случи во септември на Генералното собрание на Обединетите нации.
