Македонскиот поет Никола Маџиров е лауреат на 17-тото издание на меѓународната награда за поезија „Поезија и луѓе“ (Poetry and People – International Poetry Award), која викендов му беше доделена во кинескиот град Гуангџоу.
Ова престижно признание, кое се доделува од 2005 година за посебен придонес во современата светска поезија, претходно го добиле нобеловците Дерек Волкот и Томас Транстромер, како и лауреати на „Струшките вечери на поезијата“, меѓу кои Адонис, Адам Загајевски и Томаж Шаламун. Никола Маџиров е најмладиот досегашен странски добитник на наградата.
Во образложението на жирито се истакнува дека поезијата на Маџиров е „длабоко вкоренета во плодната почва на балканската меморија“. Жирито нагласува дека тој „зрачи со светлечки хуманизам на една нова генерација поети“ и дека неговото пишување е „двоен акт меѓу присуството на животот и крикот на духовното“.
Според жирито, Маџиров пишува со „немилосрдна искреност“ и преку „безграничната имагинација“ дава глас на скриениот јазик.
На свечената церемонија во Центарот за уметности во Гуангџоу, Маџиров ја прими наградата која се состои од скулптура инспирирана од негов стих, објавена книга на кинески јазик и паричен износ. За време на настанот, премиерно беше изведена композиција според неговата песна „Оној што пишува“, а имаше и драмска изведба според песната „Совршеноста се раѓа“.
Ова е трето меѓународно признание за Маџиров оваа година, по европската награда за поезија „Н.К. Казер“ во Италија и признанието „Почесен гостин“ на фестивал во Словенија.
