Поранешниот министер за земјоделство, шумарство и водостопанство и актуелен пратеник од СДСМ, Љупчо Николовски, преку своја објава жестоко го нападна актуелниот министер, Цветан Трипуновски, обвинувајќи го за неспособност, ароганција и лоши политики кои му штетат на земјоделството. Николовски го повика Трипуновски да ги „тргне розевите очила“ и да престане со, како што вели, „лагите и манипулациите“.
Во својата објава, Николовски наброи низа конкретни факти со кои го критикува работењето на Трипуновски:
Недостаток на транспарентност и лоши политики:
Николовски тврди дека министерот не ја објавил производната цена на грозјето до 15 јули, со што го прекршил новиот закон.
Посочува на рекордно ниски откупни цени на оризот, јачменот и пченицата.
Обвинува дека доцнат субвенциите за овчарите, а мерката за заклано јагне е укината. Исто така, земјоделците сè уште не добиле картички за зелена нафта.
Го обвини Трипуновски дека укинал, скратил и закочил сè што било успешно во земјоделството.
Укинување на програми и блокада на фондови:
Николовски посочи дека биле укинати програмите за грантови за малите земјоделци, со што се скратиле пари за нив, а се овозможило големите да добиваат милионски суми, како во времето на Груевски.
Нагласи дека за прв пат се случило да се укине предвремената исплата (аванс од 30%) на земјоделците.
Обвинува дека со ребалансот на буџетот се кратат средствата за субвенции, што досега не се случило.
Го обвини министерот за блокирање на ИПАРД програмата, поради што земјата од лидер во регионот по искористување на европски средства, сега е на дното.
Непрофесионалност и политички вработувања:
Николовски го обвини министерот дека вработува партиски војници и роднини на функционери.
Посочи дека министерството е на дното по рангирање на транспарентност и интегритет.
На крај, како последен аргумент, Николовски истакна дека Трипуновски е единствениот министер во владата за чие разрешување синдикатот писмено побарал.
