Носителката на советничката листа на СДСМ и Коалицијата во Прилеп, Драгица Николоска, упати остри критики кон кандидатот за градоначалник на ВМРО-ДПМНЕ, Дејан Проданоски, нарекувајќи го „најлошиот претседател на Совет“ што Прилеп го имал.
Николоска обвини дека во тригодишниот мандат на Проданоски како претседател на општинскиот Совет, општината го доживеала „најголемото пропаѓање“, а жителите најголемото осиромашување.
Таа потсети дека со дозвола на владејачкото мнозинство предводено од ВМРО-ДПМНЕ и Проданоски:
- Поскапеа данокот на имот, водата, комуналните услуги, паркингот и градскиот превоз.
– И покрај зголемените цени, сите општински јавни претпријатија, управувани од партиски директори, станале загубари со вкупен долг од близу 2 милиони евра.
Николоска го нарече тандемот Проданоски – Јовчески неспособен, нагласувајќи дека не успеале да реализираат ниту едно изборно ветување.
Како резултат на нивното владеење, таа посочи дека градот е со:
- Раскопани улици и град потонат во темница.
- Узурпирани јавни површини и дивоградби на секој чекор.
- Глутници кучиња скитници зад секој агол.
Николоска потенцираше дека Проданоски, како поранешен претседател на Совет, актуелен претседател на Општинскиот комитет на ДПМНЕ и пратеник, има директна одговорност за катастрофалната безбедносна состојба во Прилеп. Таа заклучи дека прилепчани нема да дозволат понатамошно тонење на градот по 4-годишната агонија во режија на Јовчески и ВМРО-ДПМНЕ.
