Патниците во Европската унија наскоро ќе имаат значително потешки услови за добивање надомест при доцнење на авионски летови, откако земјите-членки постигнаа договор за измена на досегашните правила.
Според новите предлози, кои допрва треба да бидат одобрени и од Европскиот парламент, патниците на кратки релации (до 1.500 километри) ќе имаат право на надомест само ако летот доцни најмалку четири часа. За подолги релации, прагот се зголемува на шест часа. Досега, патниците можеа да бараат надомест доколку летот доцни повеќе од три часа.
Иако новите правила го зголемуваат износот на надоместокот за кратки летови од 250 на 300 евра, за долги летови надоместот се намалува од 600 на 500 евра.
Овие измени доаѓаат по речиси 12 години преговори, откако Европската комисија првпат ги предложи во 2013 година. Според критичарите, новите правила претставуваат сериозно ограничување на правата на патниците.
Европската организација за заштита на потрошувачите (BEUC) остро реагираше, посочувајќи дека „огромен број патници ќе останат без надомест“, бидејќи најголемиот дел од доцнењата се во интервалот од два до четири часа.
Индустриската групација Airlines for Europe (A4E), пак, смета дека и новите услови не се доволни и побара уште построги критериуми, како минимум од пет часа за кратки и девет часа за долги летови.
Доколку Европскиот парламент ги одобри овие измени, патниците ширум ЕУ ќе се соочат со далеку посложена процедура за остварување на своите права – и со помали шанси за надомест кога авионот не полетува навреме.
