Во Скопје денес се одржа регионална работилница на тема „Јакнење на соработката меѓу медиумите, експертите и институциите за подобри политики за контрола на тутунот и заштита на јавното здравје во Западен Балкан“, во организација на Аналитика Тинк Тенк.
На работилницата учествуваше и министерката за образование и наука, проф. д-р Весна Јаневска, која истакна дека образованието е најдобриот механизам за подигнување на свеста кај младите за здравите навики и грижата кон личното здравје.
Јаневска посочи дека здравствената писменост е веќе застапена во воспитно-образовниот систем, особено во предметите од „природни науки“. Како нова мерка, таа најави:
Нов изборен предмет: Од оваа учебна година е воведен новиот изборен предмет „Учам за моето здравје“ во VII одделение.
Содржина за тутунот: Со поддршка на Светската здравствена организација, изготвено е упатство за наставници за предавање на материјата, која опфаќа и здравствени последици од користењето тутун и електронски цигари.
Министерката нагласи и дека годинава се донесени законски измени со кои основните и средните училишта се задолжени да спроведуваат програми за превенција од злоупотреба на алкохол и тутун, покрај постоечките програми за заштита од насилство и дискриминација.
Имплементација на меѓународната програма „Вештини за адолесценција“
Како дополнителна превентивна мерка, МОН и Бирото за развој на образованието (БРО), заедно со Канцеларијата на Обединетите Нации за дрога и криминал и Меѓународната федерација Лајонс Клуб, ќе обучат:
50 стручни соработници и 150 наставници во 50 основни училишта.
Целта е реализација на превентивната програма „Вештини за адолесценција“.
Оваа програма е базирана на докази и е насочена кон превенција од користење на цигари, дрога и алкохол. Досега е успешно имплементирана во 105 земји од светот.
Јаневска заклучи дека секогаш постои простор за унапредување на здравствената писменост во училиштата и дека институциите активно работат во таа насока.
