Македонската одбојкарска репрезентација денеска ги завршува подготовките во Скопје и утре патува за Атина, каде во среда ќе го одигра клучниот натпревар против Грција. Дуелот ќе одлучува за првото место во групата и во голема мера може да го обезбеди четвртиот последователен настап на Македонија на Европското првенство.
Селекторот Јошко Миленкоски за Атина патува со 14 одбојкари, и покрај отсуството на повредените Давид Стојанов и Филип Лепидовски.
„Оние 14 одбојкари со кои работиме во изминатиов период заминуваат за Атина. Сите се оптимистички расположени, одиме да се надигруваме, знаејќи дека Грција е голем фаворит. Ние имаме зацртано наш план и се надевам дека ќе го исполниме“, изјави Миленкоски.
Шанси за директен пласман на ЕП
Миленкоски посочи дека Грција има предност и ѝ се потребни само два освоени сета за да го освои првото место во групата. Од друга страна, на Македонија ѝ е потребен барем еден бод од натпреварот за предвреме да го реши прашањето за пласман на ЕП.
„Сепак, што и да се случи, наша обврска ќе биде на домашен терен против Грузија да го потврдиме местото на уште едно Европско првенство“, додаде селекторот.
Репрезентацијата утре наутро ќе патува со автобус до Солун, од каде со авион ќе продолжи за Атина. Истиот ден, нашата селекција ќе одржи и официјален тренинг пред натпреварот во среда.
