Општина Карпош вечерва свечено ја отвори вратата на новата административна зграда, во која ќе биде сместена целата општинска администрација. Како што изјави градоначалникот Стевчо Јакимовски, ова е „нов дом за карпошани“, кои на едно место ќе можат да ги решаваат своите проблеми и потреби.
Новиот објект се простира на површина од 4.500 квадратни метри и е еден од најсовремените административни зданија во земјава. Неговата изградба траеше повеќе од една деценија, процес кој Јакимовски го опиша како трпелив и посветен.
„Сè започна со еден камен-темелник. Можеби тогаш изгледаше како празно парче земја, но за нас тоа беше визија – сон за една нова општинска зграда, достојна за граѓаните на Карпош… Со мака, со работа и со посветеност, чекор по чекор го изградивме овој објект“, истакна Јакимовски.
Тој додаде дека зградата е симбол на заедништвото и дека кога ќе се здружат волјата и трудот, не постојат невозможни работи. Според него, новата зграда не е само бетон и арматура, туку место каде ќе се креира иднината на Карпош.
Јакимовски потенцираше дека оваа транспарентна локална установа им припаѓа на сите граѓани. „Мојот сон и мојата визија беше тука да влегувате со доверба и овде да ги добивате вашите одговори и решенија“, заврши градоначалникот. „Карпош гради, расте и ќе продолжи да чекори напред, затоа што ова е нашата заедничка приказна“.
