Унгарскиот премиер Виктор Орбан изјави дека Русија веќе ја добила војната со Украина, а Украинците ја загубиле. Оваа изјава ја даде во интервју за YouTube каналот „Патриот“, пред претстојниот состанок меѓу претседателите на САД и Русија во Алјаска.
Орбан, кој одржува блиски врски со рускиот претседател Владимир Путин, беше единствениот лидер на ЕУ кој не ја поддржа заедничката изјава во која се нагласува правото на Украина сама да одлучува за својата иднина.
„Сега зборуваме како да е ова неизвесна воена ситуација, но не е. Украинците ја загубија војната. Русија ја доби“, рече Орбан. Тој смета дека единствено прашање е кога Западот, кој ја поддржува Украина, ќе ја признае оваа реалност и какви ќе бидат последиците.
Унгарија, која во голема мера зависи од руска енергија, одби да ја поддржи Украина со оружје, а Орбан е исто така силно против членството на Украина во Европската Унија.
Според него, ЕУ ја пропуштила можноста да преговара со Путин за време на мандатот на претседателот Џо Бајден, со што сега се довела во позиција други да ја обликуваат нејзината иднина.
„Ако не сте на преговарачката маса, сте на менито“, истакна Орбан, објаснувајќи дека Будимпешта се спротивставила на заедничката изјава на ЕУ бидејќи во неа Европа изгледа „смешна и мизерна“.
