Прекин во снабдувањето со гориво до моторите е причината за падот на авионот на „Ер Индија“ минатиот месец, при што загинаа 260 лица, открива прелиминарниот извештај на индиските воздухопловни власти.
Несреќата се случи веднаш по полетувањето од аеродромот во Ахмедабад, при летот кон Лондон. Авионот „Боинг 787 Дримлајнер“ удри во земјата кратко по заминувањето од пистата. Единствено еден патник ја преживеал трагедијата.
Според наодите на Бирото за истрага на авионски несреќи на Индија, прекинувачите за контрола на горивото во пилотската кабина биле ненамерно префрлени во позиција за исклучување, по што моторите останале без напојување.
Истражителите успеале да извлечат клучни информации од црните кутии – 49 часа податоци за летови и два часа аудио снимки од пилотската кабина. Во критичните моменти, додека авионот достигнувал 180 јазли, прекинувачите на двата мотори биле последователно исклучени со временски интервал од само една секунда.
На снимките од кабина се слуша како еден пилот го прашува другиот зошто го исклучил снабдувањето со гориво, на што добива одговор дека тоа не било намерно. Моторите биле во процес на повторно активирање кога леталото се срушило.
Прекинувачите, кои се наоѓаат меѓу седиштата на пилотите, се заштитени со метални шипки и опремени со механизам за заклучување за да се спречат несакани дејства. Сепак, според извештајот, тие биле поместени од позицијата RUN во CUTOFF, што го прекинало протокот на гориво.
Снимките од безбедносните камери на аеродромот покажале дека бил активиран системот за итни случаи Ram Air Turbine – јасен показател за губење на главната енергија. Несреќата се случила пред авионот да го надмине периметарот на аеродромот.
Неколку секунди пред падот, еден од пилотите очајно испратил сигнал „Mayday“, но контролорот на летот не добил одговор и го забележал падот на авионот во далечина.
Дополнителните анализи покажале дека:
- Авионот бил во дозволените граници на тежина при полетување,
- Горивото било од соодветен квалитет,
- Нема знаци за присуство на птици во близина,
- Не се носеле опасни материи,
- Закрилките биле во соодветна положба за полетување,
- Опремата за слетување била спуштена – што сугерира дека полетувањето било во ред до моментот на губење на потисок.
Истражната комисија продолжува со анализа на можни човечки фактори, како и на безбедносните процедури што можеле да спречат трагедијата.
