Гробот на папата Франциск е изработен од лигурски мермер и ќе го носи само неговото име на латински – Franciscus, заедно со реплика од неговиот папски крст. Телото ќе биде пречекано од група сиромашни лица во базиликата Света Марија Велика, каде што ќе биде и погребан во сабота, потврди Ватикан.
Гробницата е сместена во ниша на страничниот кораб, меѓу капелите Паолина и Сфорца, во близина на олтарот посветен на Свети Фрањо – светителот по кој папата го одбра своето име. Тој често се молеше во оваа базилика пред и по секое патување.
Симболично, група сиромашни лица ќе го дочекаат ковчегот со телото на папата при пристигнувањето во базиликата. Погребната поворка ќе се движи од базиликата Свети Петар кон Света Марија Велика, со бавен чекор, за луѓето да имаат можност да се простат од папата.
Погребот ќе биде едноставен и приватен, во согласност со желбите на папата, а преносот во живо ќе заврши со влезот во базиликата. Директорот на ватиканската медиумска служба, Матео Бруни, нагласи дека оваа скромност е дел од папскиот дух.
На церемонијата ќе присуствуваат 130 официјални делегации, меѓу кои и 50 шефови на држави и 10 монарси. Меѓу присутните ќе има и мигранти и бегалци, спасени од либиски кампови, кои папата Франциск ги поддржуваше и со кои се среќаваше преку здружението Медитеранеа.
