Фондот на пензиското и инвалидското осигурување на Северна Македонија (ПИОСМ) и Фондот на пензиското и инвалидското осигурување на Република Српска потпишаа договор за електронска размена на податоци.
Директорот на ПИОСМ, Никола Мемов, истакна дека со овој договор се заокружува регулирањето на размената на податоци со сите држави од поранешна Југославија. Тој додаде дека договорот ќе го забрза процесот на остварување на правата и ќе ја подобри соработката.
Договорот предвидува размена на податоци за да се спречат неосновани исплати на пензии, на пример, во случаи на смрт на корисникот. Исто така, тој ги регулира целта, начинот, обемот и видот на податоците што се разменуваат, како и нивната заштита.
Директорот на Фондот на ПИО на Република Српска, Младен Милиќ, потенцираше дека ова ќе ја зголеми точноста на податоците и ќе го подигне квалитетот на услугите за осигурениците од двете земји.
Како дополнување на договорот, потпишан е и Технички протокол од страна на Нехат Мустафа од ПИОСМ и Велибор Максимовиќ од Фондот на Република Српска.
