Во пресрет на вториот круг од локалните избори, кандидатот за градоначалник на Општина Неготино од редовите на СДСМ, Петар Мантев, ги претставува своите клучни приоритети и развојна стратегија за наредниот четиригодишен мандат. Во интервјуто, Мантев ги детализира плановите за капитална инфраструктура, економскиот развој преку гасификација и обиколници, зајакнувањето на противпожарните капацитети, како и визијата за претворање на Неготино во препознатлив винско-туристички центар.
Азманоски: Кои се вашите три клучни приоритети за развојот на Општина Неготино во наредните четири години и како тие директно ќе го подобрат животот на граѓаните?
Мантев: Моите три клучни приоритети за развој на Општина Неготино во наредните четири години се насочени кон вистински инфраструктурен напредок, подобрување на услугите и подигнување на квалитетот на живот:
Модернизација на централното градско подрачје со целосна реконструкција на градскиот плоштад, воведување функционално сообраќајно решение со кружен тек и покривање на дел од градскиот кеј. Ова ќе обезбеди побезбеден сообраќај, намалени сообраќајни метежи, модерен изглед на градското јадро и повеќе простор за социјален и културен живот на граѓаните.
Рекреативно уредување и зелен развој кај СРЦ „Младост“. Реализацијата на овој проект ќе создаде уреден рекреативен и хортикултурен простор кој ќе биде нова зелена оаза за спорт, одмор и дружење. На граѓаните, особено на младите и семејствата, ќе им обезбедиме место за здрави навики, спортски активности и квалитетно поминато време на отворено.
Зајакнување на капацитетите на ТППЕ – Неготино. Соочени со големите пожари на планината Серта во 2024 година, која претставува „белите дробови“ на нашиот град, станува повеќе од јасно дека имаме потреба од модернизација и зајакнување на капацитетите на Територијалната противпожарна единица и на доброволните пожарникарски друштва. Затоа, планираме:
Изградба на нов, модерен објект за Територијалната противпожарна единица, кој ќе овозможи подобри услови за работа и ефикасно справување со пожари.
Обезбедување на нови возила и современа опрема, која ќе ја зголеми мобилноста и реактивноста на нашите пожарникарски единици.
Подобрување на меѓународната соработка преку обуки и размена на искуства, што ќе придонесе за зголемување на стручноста и подготвеноста на нашите екипи и доброволните противпожарни друштва.
Со овие мерки, директно ја зголемуваме безбедноста на граѓаните и подготвеноста за справување со пожари, природни непогоди и други кризни ситуации.
Азманоски: Каков е вашиот конкретен план за поддршка на локалните бизниси и привлекување нови инвестиции, со цел отворање на нови и подобро платени работни места за младите во Неготино?
Мантев: Мојата стратегија за поддршка на локалните бизниси и привлекување нови инвестиции е насочена кон подобрување на инфраструктурата, намалување на бариерите и обезбедување модерни услови за развој на економијата и отворање нови работни места.
Изградба на јужна и северозападна обиколница. Со изградбата на обиколниците ќе обезбедиме побрз транспорт, подобра логистика и полесен пристап до индустриските зони. Ова ќе го намали сообраќајниот метеж во градот и ќе создаде услови Неготино да биде поатрактивна дестинација за домашни и странски инвеститори, особено во производството и агробизнисот.
Санација и доградба на водовод и канализација во Индустриска зона – УЗ 8. Модерната и функционална комунална инфраструктура е основен предуслов за развој на секоја индустриска зона. Со овој проект ќе им овозможиме на постојните компании непречено работење, а воедно ќе отвориме можности за нови фабрики и погони, што директно значи нови и стабилни работни места.
Изградба на секундарна дистрибутивна гасоводна мрежа. Со гасификацијата ќе обезбедиме пониски трошоци за енергија за стопанството, што е особено важно за производствените бизниси. Поевтината енергија значи поголема конкурентност, нови инвестиции и можност за повисоки плати — особено за младите кадри, кои сакаме да останат и работат во Неготино.
Азманоски: Освен редовното одржување, кој капитален проект сметате дека е најважен за комплетирање на модерната инфраструктура на Неготино и како ќе обезбедите средства за негова реализација?
Мантев: Капиталниот проект што го сметам за најзначаен за комплетирање на модерната инфраструктура на Неготино е изведбата на исклучок од автопатот А1/Е75 (делница Велес – Неготино) и негово директно поврзување со регионалниот пат Р1102. Овој проект ќе овозможи побрза и поефикасна комуникација со Коридор 10, ќе ја подобри поврзаноста со индустриските зони и ќе го скрати времето на патување за граѓаните, туристите и бизнис-секторот. Со тоа, Неготино ќе го зацврсти својот позиционен потенцијал како сообраќајна и економска раскрсница во регионот.
За реализацијата на овој проект предвидуваме комбиниран модел на финансирање и тоа: соработка со ЈП за државни патишта и Министерството за транспорт и врски, средства преку европски и меѓународни фондови за транспортна и регионална поврзаност, како и делумно буџетско учество на општината за проектна документација и експропријација, согласно фазите на реализација. Со ваков пристап ќе обезбедиме финансиска одржливост и навремена реализација на проектот, без да се загрози буџетската стабилност на општината. Долгорочните придобивки на овој проект се побрз проток на луѓе и стоки, поволни услови за инвеститорите, зголемена локална и регионална активност, но што е важно да се напомене и помал метеж во градот.
Азманоски: Неготино има богата историја и вински потенцијал. Како планирате да ја искористите оваа предност за да го направите градот поатрактивен културен и туристички центар?
Мантев: Неготино има силен бренд – виното, традицијата и богатата историја – и мојата цел е тие да не останат неискористен потенцијал, туку да станат двигател за нов културен, туристички и економски раст. За таа цел, ќе го поддржам развојот на локалните винари и ќе воспоставам официјална „Винска мапа на Неготино“, а во иднина ќе организираме и препознатлив Вински фестивал.
Исто така, ќе создадеме целогодишна туристичка понуда базирана на винската традиција, со вински викенд-пакети кои комбинираат посети на винариите, дегустации и локална гастрономија, тематски вински рути и патеки поврзани со историјата и културата, како и „weekend escape“ понуди за домашни и странски гости. Дополнително, ќе се развие календар на културни и вински настани кој ќе привлече туристи цела година, не само локална публика.
Покрај тоа, ќе го развиеме локалитетот „Бела Вода“ како ново излетничко и природно јадро на туризмот, со патно решение од Калањево, рекреативна инфраструктура, пешачки патеки и летни содржини, што ќе го направи главна атракција за семејни тури, спорт и еко-туризам. Во исто време, со изградба на современ туристички комплекс на Тимјаничка Цуцка ќе создадеме уникатна винска и видиковна точка со дегустациски центар, етно-елементи и панорамско уредување, во партнерство со локалните винарии. Резултатот ќе биде посилна туристичка економија, поголеми приходи за винариите и локалните бизниси, нови работни места и зголемена препознатливост на Неготино како винско-срце на Македонија. Неготино има бренд. Време е да го претвориме во развој, економија и препознатливо туристичко искуство.
Азманоски: Кои иновативни мерки ќе ги преземете за подобрување на еколошката слика на општината, особено во делот на управување со отпад, зелени површини и чист воздух?
Мантев: Еколошката слика на Неготино мора да се подобрува системски, со јасни чекори и мерливи резултати. Мојата стратегија се темели на три клучни столба: управување со отпад, зелени површини и чист воздух. Во наредните четири години ќе воведеме модерни, ефикасни и европски практики што веќе даваат резултати во успешни помали општини во регионот и ЕУ.
Преку зголемување на садовите за селекција на отпад на повеќе јавни површини ќе го зајакнеме системот на „сортирај од дома“. Истовремено, ќе спроведеме операција „Стоп за диви депонии“ – мапирање, расчистување и надзор на ризичните точки, а дел од исчистените површини ќе ги претвориме во мини-зелени зони и паркови. Во централното подрачје ќе поставиме подземни или затворени контејнери, со што ќе обезбедиме почист град и повисоки хигиенски стандарди.
Планираме систематско озеленување на јавните површини, засадување дрвореди кај училиштата и главните сообраќајници и уредување нови зелени зони во секое маало и населено место.
Покрај промоцијата на велосипедски патеки и воведување на јавен транспорт, ќе преземеме и конкретни мерки за два најкарактеристични извора на загадување во нашиот регион:
Греењето на домаќинствата – ќе воведеме субвенции за инвертер-клими и печки со висока енергетска ефикасност, со посебна поддршка за социјално ранливи категории.
За печењето на ракија во сезоната – ќе воспоставиме јасни правила и поддршка за користење еколошки горива и филтер-решенија, со совети и инспекциски надзор, за да го намалиме сезонскиот чад без да ја загрозиме традицијата.
Со овие мерки ќе ја подигнеме еколошката култура, ќе го намалиме загадувањето, ќе ја спречиме појавата на диви депонии и ќе создадеме позелена, почиста и поздрава општина. Неготино мора да стане средина во која грижата за природата е обврска на институциите, но и заедничка навика на сите граѓани.
Азманоски: Како ќе ја подобрите транспарентноста на Општината и кои нови механизми за директна комуникација ќе воведете за граѓаните активно да учествуваат во креирањето на локалните политики?
Мантев: Транспарентноста и отворената комуникација со граѓаните ќе бидат основата на моето работење. Верувам дека модерната општина мора да создаде систем во кој жителите имаат пристап до информациите, влијаат врз одлуките и можат директно да проверат како се трошат јавните пари.
Затоа, во првата година ќе воведам неколку клучни механизми:
„Отворен буџет“ и целосно видливи трошоци на Општината. На официјалната веб-страница секој граѓанин во секое време ќе може транспарентно да ги следи буџетските трошоци, динамиката на реализација на проектите и состојбата со јавните набавки. Овој модел веќе функционира успешно во повеќе општини и значително го намалува просторот за сомнежи и неточни информации.
Нови канали за директна комуникација со граѓаните. Покрај редовните средби на терен, ќе воведам: „Отворени денови со градоначалникот“ еднаш неделно, мобилна апликација и онлајн сервис „Пријави проблем“ со можност за следење на статусот, како и 24-часовен контакт-центар за комунални прашања. Целта е реакциите да бидат брзи, а граѓанинот навремено информиран за тоа што се презема.
Вклучување на јавноста во носењето одлуки. Ќе го воведам моделот на партиципативно буџетирање, каде што жителите ќе предлагаат и ќе гласаат за приоритетни проекти по месни заедници. Дополнително, сите поважни одлуки, урбанистички решенија и стратешки документи ќе бидат предмет на јавни и онлајн расправи, со објавени записници и препораки.
Дигитализација на услугите за поголема ефикасност и контрола. Планираме постепено воведување на електронски услуги за најчестите општински процедури, со што ќе се намали бројот на шалтерски контакти, времето на чекање и можноста за било какви притисоци или неправилности.
Верувам дека со овие мерки ќе изградиме систем во кој довербата не се бара – туку се заслужува. Моја цел е Неготино да стане пример за модерна, отчетна и сервисно ориентирана локална самоуправа во која граѓаните ќе бидат вистински партнери во развојот на општината.
Азманоски: Што конкретно ќе направите за подобрување на условите за спортските клубови и младите во Неготино, на пример, преку изградба, реконструкција или модернизација на спортски објекти и терени?
Мантев: Мојата најјака страна се младите и спортот во Неготино. Сакам да им обезбедиме вистински услови за развој, тренинг и натпреварување. Верувам дека со модерна спортска инфраструктура можеме да ги поддржиме спортските клубови, да ги мотивираме младите и да создадеме здрави навики кај новите генерации.
Еден од главните проекти е модернизацијата на Градскиот стадион. Планираме целосна реконструкција на трибините и поставување на современ вештачки терен на локацијата на поранешното ракометно игралиште. Со ова, спортските клубови ќе добијат подобри и безбедни услови за тренинг и натпревари, а Неготино ќе стане место за меѓуопштински и регионални спортски случувања.
Планираме и уредување на просторот кај СРЦ „Младост“, создавајќи нов спортско-рекреативен парк со содржини за млади, деца и семејства. Тој простор ќе стане точка за дружење, спорт и активен живот достапна за сите генерации.
Со реконструкцијата на тротоарите и велосипедските патеки на делницата од патот R1103 ќе се овозможи безбедно пешачење, трчање и велосипедски спорт, особено за младите. Ова ќе ја зголеми безбедноста во сообраќајот и ќе ја доближи рекреацијата до секој граѓанин.
Со овие активности сакаме да создадеме системски пристап: подобри услови за спортските клубови, повеќе содржини за младите и здрав, активен начин на живот за заедницата. Неготино заслужува да биде град каде спортот не е привилегија, туку развој, мотив и навика за секој негов граѓанин.
