Здружението на оштетени штедачи на Еуростандард банка денеска ја одбележа петгодишнината од стечајот на банката, со остро обраќање до јавноста и институциите. Според Здружението, пет години по затворањето на банката, истрагата за случајот сè уште не е мрдната од мртва точка.
„Пет години подоцна, истрагата што ја води Основното јавно обвинителство за гонење на организиран криминал сè уште тапка во место. Пет години поминаа, а немаме ниту едно обвинение, ниту еден обвинет, ниту едно рочиште. Само молк“, се наведува во соопштението.
Споредба со светски градежни проекти и критики кон институциите
Здружението истакнува дека во изминатите пет години светот се трансформирал, наведувајќи примери како изградбата на Ајфеловата кула за две години и Емпајр стејт билдинг за нешто повеќе од една година. Тие ја споредуваат оваа ефикасност со состојбата во Македонија, каде што за правда „не е доволно ни времето, ни вистината, ни сведоштвата, ни нашата борба“.
„Ќе се изгради ли побрзо брзата пруга Скопје-Солун, отколку што нашите граѓани ќе дочекаат правда? Или правдата е единствениот проект што никогаш не е планиран во оваа земја?“ – прашуваат оштетените штедачи.
Тие потсетуваат на јавното признание на Трифун Костовски за сторен криминал, како и на незаконското префрлање на 3 милиони евра депозити во Комерцијална банка. Здружението нагласува дека според извештајот за стечајот, 149 фирми не вратиле ниту една рата, а 58 од нив добиле кредити вредни 16,8 милиони евра, обезбедени само со обични меници.
Порака до институциите
Здружението категорично одговара на повиците за расформирање, порачувајќи дека ќе постои „додека последниот денар не биде вратен и додека последниот одговорен не биде изведен пред лицето на правдата“.
На крајот, со горчина прашуваат: „Што очекувате да се случи прво – градењето на новата пруга до Солун или конечно поднесување на обвинение за криминал тежок над 50 милиони евра?“.
Одговорот, велат, го очекуваат од Обвинителството, а одговорноста ќе ја бараат „секој ден, сè додека постоиме“.
