Големиот пожар што избувна во фабриката „Винчини“ во Виница е ставен под целосна контрола. Неколку пожарникари се здобиле со изгореници на стапалата, откако се заглавиле во смола од стопен шеќер додека се обидувале да го изгаснат пожарот.
Директорот на Дирекцијата за заштита и спасување (ДЗС), Стојанче Ангелов, соопшти дека огнената стихија зафатила три производни погони и два магацини. Благодарение на брзата интервенција на противпожарните екипи, спречена е поголема штета и спасени се останатите делови од фабриката, вклучувајќи и магацини со готови производи и суровини.
Во гаснењето на пожарот учествуваа тимови од повеќе градови: Виница, Македонска Каменица, Делчево, Кочани, Пробиштип, Штип, Струмица, Кавадарци и Велес.
Пожарот бил пријавен во 18:40 часот преку бројот за итни случаи 112, а на терен веднаш излегле екипите на ТППЕ Виница, кои добиле поддршка од околните општини.
