Директорот на Дирекцијата за заштита и спасување (ДЗС), Стојанче Ангелов, информираше дека на депонијата Дрисла сè уште има чадење, но ситуацијата е подобра во споредба со вчерашниот ден. Тој објасни дека пожарите на депониите тешко се гаснат со вода поради хемиските и биолошките процеси кои создаваат запаливи гасови.
На терен дејствува „ер-трактор“ кој се обидува да го ублажи чадењето со посебна пена, а Ангелов очекува дека до вечерните часови чадот ќе биде целосно намален или ќе прекине.
Во однос на депонијата Вардариште, Ангелов информираше дека таму нема ниту горење, ниту чад. За да се спречат идни инциденти, ангажирана е агенција за обезбедување, чиј тим е веќе на терен. Ќе биде изработен и детален план за да се спречат обиди за повторно подметнување пожар, бидејќи постојат сомненија дека и Дрисла и Вардариште биле намерно запалени.
Ангелов потсети дека веќе има кривична пријава и притвор за три лица кои биле вклучени во нелегален откуп на материјали од оние кои палат кабли. Тој се надева дека со ова ќе се обесхрабрат слични активности во иднина.
