Поранешната претседателка на Државната комисија за спречување на корупцијата (ДКСК), Билјана Ивановска, која неодамна ја објави својата кандидатура за општина Центар од „Независни заедно“, е под истрага од Обвинителството за „несовесно работење“. Кривичната пријава е поднесена поради начинот на кој ДКСК отворила и постапувала по одреден предмет, како и за споделување на информации за истиот во јавноста.
Ивановска, во придружба на нејзиниот адвокат Драган Малиновски, исто така поранешен антикорупционер, дала исказ пред обвинителката Адела Бојчевиќ во скопското Обвинителство. Она што е особено значајно е дека поканата за распит ѝ била доставена само 11 часа откако ја објави својата кандидатура за градоначалничка.
Ивановска не откри за кој предмет станува збор, ниту пак го откри името на пријавителот. Таа изјави дека според пријавата, проблематични биле информациите што се давале во јавноста, како и некои новинарски пишувања за случајот, за кои нагласи дека Комисијата не може да ги контролира.
Предметот бил отворен по пријава на член на Комисијата, а на крајот бил затворен без никакви наоди или сомнежи.
„Јас бев повикана во Јавното обвинителство поради кривична пријава за несовесно работење по членот 353-В. Обвинета сум дека наводно начинот на кој ние сме ги отворале предметите во ДКСК и споделувањето на информациите во јавноста било спорно за пријавителот. Денес на обвинителката ѝ појаснив на кој начин ДКСК ги оформува предметите. Во конкретниот случај, предметот беше отворен по сопствена иницијатива, односно по иницијатива на член на Комисијата. Постапката е завршена без никакви сомнежи, но она што било спорно за пријавувачот е начинот на кој сме комуницирале со јавноста, а вие знаете дека бевме премногу транспарентни“, изјави Ивановска по распитот.
