Управата за извршување на санкции (УИС) ја сподели информацијата дека во државата е донесена првата пресуда за куќен затвор која ќе се спроведе со користење на електронска алка.
Осуденото лице е 79-годишен велешанец на кого му е изречена казна куќен затвор во траење од три месеци за кривично дело полово вознемирување (член 190-а, став 2 од КЗ).
Иако осудениот побарал одлагање, барањето е одбиено, што значи дека пресудата наскоро ќе почне да се извршува.
„По подготовка на индивидуална програма од страна на пробациски службеник ќе биде поставена опремата за електронски надзор на осуденото лице,“ одговорија од УИС.
Директорот на УИС, Александар Пандов, претходно најави дека електронските алки се ставаат во функција со основна цел намалување на затворската популација, со оглед на пренатрупаноста во дел од затворите.
Еден затвореник ја чини државата над 2.000 денари дневно, поради што алките се сметаат за важно решение за растеретување на буџетот.
Позитивните законски прописи овозможуваат електронски надзор да добијат три категории осуденици:
- Стари и изнемоштени лица.
- Бремени жени или мајки со мали дечиња.
- Тешко болни и лица со инвалидитет.
Од УИС претходно соопштија дека 60 осуденици веќе аплицирале за користење на електронски алки.
Управата за санкции формираше посебно одделение за електронски надзор. Системот е програмиран да сигнализира со „црвено“ доколку осуденикот:
- Се одалечи од дозволениот периметар.
- Го помести рутерот.
Доколку системот алармира, службениците од УИС се јавуваат на осуденото лице (преку сим-картичката во рутерот). Ако тоа не се јави, се контактира блиско лице, а ако и тоа не одговори, се алармира полицијата.
Пандов изрази верување дека осудениците кои ќе добијат алка „нема да си дозволат да ја злоупотребуваат“.
