Предизборната кампања за локалните избори 2025 продолжува со митинзи и прес-конференции на најголемите политички партии низ земјата. Во фокусот се обраќањата на партиските лидери и претставувањето на кандидатите за градоначалници на Скопје.
ВМРО-ДПМНЕ и коалицијата денеска ќе одржат митинзи и средби со граѓани во Маврово, Ростуше, Гостивар и Тетово.
Предизборниот караван на СДСМ е насочен кон јужниот дел на земјата, со активности во Дојран, Богданци, Гевгелија и Валандово.
Од Левица за денеска најавија средба со граѓани во Неготино. На настанот ќе присуствуваат лидерот на партијата Димитар Апасиев, пратеникот Сашко Јанчев, носителот на листа Никола Ламбев и останатите кандидати за советници.
ГРОМ – Граѓанска Опција за Македонија планира работен медиа брифинг за поблиско запознавање со програмата на Александар Трајановски, кандидат за градоначалник на Град Скопје од коалицијата „Искуство за успех“.
Во текот на денот најавени се повеќе прес-конференции и изјави од кандидатите за градоначалници:
Орце Ѓорѓиевски, кандидат за градоначалник на Град Скопје од ВМРО-ДПМНЕ, ќе одржи прес-конференција во Општина Бутел.
Каја Шукова, кандидатка за градоначалничка на Скопје од СДСМ, и Влатко Митовски, кандидат за градоначалник на Општина Гази Баба, ќе дадат изјави за медиумите.
Амар Мециновиќ, кандидат за градоначалник на Град Скопје, најави прес-конференција на која ќе го презентира целосното решение за јавниот превоз во Скопје.
Прес-конференции се најавени и од потпретседателот на ДУИ Арбер Адеми, како и од кандидатите Селвер Ајдини (Куманово), Исамедин Азизи (Бутел) и Бујар Османи (Чаир) од НАИ.
