Израел и Сирија се договориле за прекин на огнот, потврди американскиот амбасадор во Анкара, Том Барак. Според него, примирјето е резултат на дипломатски иницијативи предложени од Турција, Јордан и други држави од регионот, кои се вклучија во напорите за смирување на тензиите.
Овој договор доаѓа по израелскиот напад на Дамаск од 16 јули и притисоците кон сириските владини сили кои напредуваа кон градот Свеида. Израелските власти изјавија дека дејствувале во насока на заштита на сириските Друзи – малцинска, но влијателна етнорелигиозна заедница со присуство и во Израел и Либан.
„Ги повикуваме Друзите, Бедуините и Сунитите да го положат оружјето и, заедно со другите малцинства, да изградат нов и обединет сириски идентитет“, напиша Барак на социјалната мрежа Икс.
Иако примирјето е најавено, официјален одговор од израелската амбасада во Вашингтон и сирискиот конзулат во Канада засега нема.
Објавувањето на прекинот на огнот уследи откако американскиот државен секретар Марко Рубио изјави дека САД поддржуваат „деескалација на вознемирувачката и ужасна ситуација“ и работат на конкретни чекори за стабилизирање на состојбата.
