Претседателот на Премиер лигата, Ричард Мастерс, денеска изјави дека англиските фудбалски клубови нема да играат лигашки натпревари надвор од земјата. Тој нагласи дека идејата, која се дискутирала пред десет години, повеќе не е актуелна.
„Тогаш се сметаше дека ова може да ја зголеми популарноста на Премиер лигата на меѓународниот пазар. Сепак, денес нема повеќе потреба од тоа, бидејќи Премиер лигата е веројатно најатрактивната и најгледаната фудбалска лига во светот. Како заклучок, ваквите планови повеќе не постојат“, рече Мастерс.
Оваа одлука на Премиер лигата се разликува од плановите на другите европски лиги. Италијанската Серија А и шпанската Ла Лига најавија дека ќе играат по еден натпревар во странство со цел да ја зголемат својата популарност на меѓународниот пазар.
Натпреварот од Серија А меѓу Милан и Комо треба да се одигра во австралиски Перт на 8 февруари 2026 година.
Дуелот од Ла Лига меѓу Барселона и Виљареал е закажан за 21 декември оваа година на стадионот „Хард Рок“ во Мајами, САД.
И покрај овие најави, за да се реализираат, италијанската и шпанската лига ќе треба да добијат согласност од УЕФА и ФИФА.
