Во Основниот кривичен суд во Скопје продолжува судскиот процес за убиствата на 14-годишната Вања Ѓорчевска и велешанецот Панче Жежовски, што го потресе јавноста кон крајот на 2023 година. Обвинети во случајот се Љупчо Палевски – Палчо, Боре Видевски, Велибор Манев, Влатко Кешишев и таткото на девојчето, Александар Ѓорчевски.
Обвинителството ги товари за грабнување, убиство и учество во организирана група, при што мотивите се поврзуваат со изнудување откуп и обезбедување возило за криминални активности.
На последното рочиште беа презентирани нови видео докази, меѓу кои и снимка од бензинска станица каде, според обвинителството, Влатко Кешишев полнел балон со бензин на 27 ноември – денот кога наводно била убиена Вања. Прикажани беа и снимки од возилото „Рено Кангу“, кое се движело низ Скопје во утринските часови истиот ден.
Одбраната на Палевски, пак, приложи уплатница од банка како доказ дека тој не бил присутен на местото на убиството во критичниот период. Исто така, предложено е да се прибави и видео од експозитурата на Халк Банка за дополнително верификување на неговото присуство таму.
Судијата Ивица Стефановски најави дека доказната постапка ќе се дополни со нови материјали, а распитот на обвинетите продолжува. Се очекува преку овие сведочења да се добие појасна слика за мотивите и начинот на извршување на двојното убиство што ја шокираше јавноста.
