Регулаторната комисија за енергетика (РКЕ) ги издаде првите лиценци за батериски системи за складирање на електрична енергија, означувајќи го почетокот на нов инвестициски циклус во македонската енергетика. Првите две лиценци ги доби компанијата ЕНЕРГО СОЛАР СИСТЕМИ за батериски системи со вкупна инсталирана моќност од 2.600 kW, кои се инсталирани во склоп на две веќе постоечки фотонапонски електроцентрали (ФЕЦ).
Претседателот на РКЕ, Марко Бислимоски, посочи дека воведувањето на батериите во пракса значи забрзана енергетска транзиција и создавање одржлив, ефикасен и еколошки енергетски систем.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Воведувањето на батериите во пракса значи забрзана енергетска транзиција преку создавање на одржлив, ефикасен и еколошки енергетски систем во земјава,“ истакна Бислимоски.
Бислимоски очекува голем број сопственици на ФЕЦ да поднесат барање за инсталирање на вакви складишта, но и да се појават компании кои би биле самостојни оператори на батериски системи.
Според РКЕ, употребата на батериите ќе придонесе за:
- Сигурно и доверливо функционирање на системите и економски посигурен и поефикасен енергетски пазар.
- Обезбедување услуги на операторот на електропреносниот систем за балансирање и одржување на параметрите на мрежата во пропишани граници.
- Намалување на вкупните трошоци во системот преку складирање на енергија во периоди кога има вишок и нејзино користење во периоди кога потребите се зголемуваат.
Условите, постапката и потребната документација за добивање на лиценца за складирање на електрична енергија се уредени во Законот за енергетика и Правилникот за лиценци.
