И покрај тоа што ко-сопственикот на Манчестер Јунајтед, сер Џим Ратклиф, го потврди Рубен Аморим како сигурен на клупата по победата над Сандерленд, легендарниот капитен на „црвените ѓаволи“, Рој Кин, сепак смета дека на тимот му е потребна промена и има идеален кандидат: Диего Симеоне.
Кин отворено изјави дека би сакал да го види сегашниот тренер на Атлетико Мадрид на „Олд Трафорд“, верувајќи дека неговиот карактер е токму она што му треба на клубот.
„Ако некогаш се отвори место за нов тренер, го кажувам ова веќе некое време – би сакал (Диего) Симеоне од Атлетико Мадрид да ја преземе таа позиција. Мислам дека би создал хаос, но добар хаос. Тој би го направил тоа. Нема гаранција, но би сакал само да го видам неговиот карактер,“ изјави Кин.
Ирската легенда смета дека стилот на игра на Симеоне би се вклопил совршено во Јунајтед.
„Начинот на кој игра неговиот тим би се вклопил совршено во клубот, иако тој не е толку дефанзивно настроен како што мислат некои луѓе“, рече Кин.
Кин ги отфрли критиките за дефанзивната тактика на Аргентинецот, потсетувајќи на неодамнешните резултати на Атлетико.
„Луѓето можеби размислуваат за неговиот стил на фудбал, но тие постигнаа пет гола против Реал Мадрид минатиот викенд. Не му се допаѓа што неговите тимови примаат многу голови или примаат многу шанси, но тие можат да играат и да се борат.“
