Москва и Њу Делхи преговараат за зголемување на испораките на руските ракетни системи С-400 за Индија, објави новинската агенција ТАСС. Информацијата ја потврди Дмитриј Шугаев, раководител на руската Федерална служба за воено-техничка соработка.
„Индија веќе го има нашиот систем С-400, но постои потенцијал за проширување на соработката и во оваа област“, изјави Шугаев, додавајќи дека двете земји се „во фаза на преговори“.
Индија во 2018 година потпиша договор со Русија вреден 5,5 милијарди долари за набавка на пет ракетни системи С-400, кои Њу Делхи ги смета за клучни за одбрана од заканите од Кина. Сепак, испораките се одложуваа неколку пати, а се очекува последните два системи да бидат доставени во 2026 и 2027 година.
Односите меѓу двете земји се зајакнуваат, особено во услови на притисокот од Западот врз Русија. Рускиот министер за надворешни работи, Сергеј Лавров, истакна дека Индија не попуштила пред барањата на САД да престане да купува руски ресурси, што Москва „го цени“. Индискиот премиер Нарендра Моди му порача на рускиот претседател Владимир Путин дека двете земји стојат рамо до рамо дури и во тешки времиња.
