Соединетите Американски Држави му соопштија на Советот за безбедност на Обединетите нации дека ќе го „бранат секој сантиметар од територијата на НАТО“, откако руски беспилотни летала навлегоа во Полска. Американската амбасадорка во ОН, Дороти Шеа, изјави дека САД се со своите сојузници од НАТО по овие „алармантни нарушувања на воздушниот простор“.
Овие коментари доаѓаат откако американскиот претседател Доналд Трамп изјави дека инцидентот можеби бил грешка. Шеа ја критикуваше Русија за засилената кампања за бомбардирање во Украина по средбата на Трамп со рускиот претседател Владимир Путин.
„Овие дејствија, сега со додавање на нарушување на воздушниот простор на сојузник на САД – без разлика дали се намерни или не – покажуваат огромно непочитување кон добронамерните напори на САД за завршување на овој конфликт“, рече Шеа.
Полска собори беспилотни летала во својот воздушен простор со поддршка на сојузниците од НАТО. Полскиот државен секретар Марчин Босацки изјави пред Советот за безбедност дека „знаеме, и повторувам, знаеме, дека ова не беше грешка“. Тој покажа фотографии од соборениот дрон, на кои се гледаат руски натписи.
Самуел Жбогар, словенечкиот амбасадор во ОН, исто така ја поби идејата дека упадот бил грешка, велејќи дека е „тешко да се замисли дека толку многу беспилотни летала ненамерно летале толку длабоко над полска територија“.
Рускиот амбасадор во ОН, Василиј Небензија, изјави дека руските сили напаѓале цели во Украина и немале намера да погодат цели во Полска. Тој додаде дека Русија е подготвена да разговара со Полска за намалување на тензиите.
САД и 42 западни сојузници издадоа заедничка изјава во која ја обвинија Москва за кршење на меѓународното право и повелбата на ОН и ја повикаа Русија да ја прекине својата агресија врз Украина.
