Социјалдемократскиот сојуз на Македонија (СДСМ) бара од Основното јавно обвинителство (ОЈО) да поведе кривична постапка против началникот на Одделението за внатрешни работи (ОВР) Демир Хисар, Роберт Мартиноски, и да ја прошири истрагата. Ова беше соопштено на прес-конференцијата на потпретседателот на Социјалдемократската младина на Македонија (СДММ), Јовица Јанковиќ.
Според СДСМ, фактите се јасни: началникот ги прекршил своите овластувања и ја злоупотребил положбата спроведувајќи, како што велат, „незаконска постапка и политички прогон против болна жена“.
„Самото МВР ја призна неговата вина и го потврди она што СДСМ го говореше од првиот ден, дека началникот постапувал незаконски“, изјави Јанковиќ.
Обвинителството да ја прошири истрагата
СДСМ смета дека само дисциплинска постапка не е доволна и дека ОЈО мора да поднесе кривична пријава за да се обезбеди процесуирање на началникот. Партијата предупредува дека доколку тоа не се случи, ќе значи директна заштита на Мартиноски, а со тоа и на министерот Панче Тошковски.
Јанковиќ нагласи дека истрагата треба да се прошири и да одговори на прашањето дали Мартиноски постапувал по налог на Тошковски. Како основа за сомнежите, го наведе фактот што Мартиноски претходно бил суспендиран поради рекет, но и покрај тоа, веднаш по доаѓањето на Тошковски, бил поставен за началник.
СДСМ, исто така, бара обвинителството да ја провери целата незаконска постапка спроведена против директорката на училиштето во Демир Хисар и да се осигура дека сите што ги прекршиле законите ќе одговараат.
„СДСМ бара ОЈО да покаже дека законот важи за сите, особено за началниците на Тошковски, и да стави крај на злоупотребите на полицијата во партиска служба на ВМРО-ДПМНЕ“, порача Јанковиќ.
