Социјалдемократскиот сојуз на Македонија (СДСМ) денеска излезе со анализа на изборните резултати, тврдејќи дека владејачката коалиција предводена од ВМРО-ДПМНЕ и Движење ЗНАМ претрпела голем пад во поддршката. Според партиската споредба, ВМРО-ДПМНЕ загубиле околу 135.000 гласови, а ЗНАМ е „најголем губитник“ со пад од 33% од гласовите.
По преброени 99% од гласовите, СДСМ соопшти дека се потврдува нивната теза дека актуелната власт на овие избори ќе изгуби огромен број гласови. Партијата врши споредбена анализа со резултатите од минатата година, според која ВМРО-ДПМНЕ и ЗНАМ изгубиле речиси една третина од гласовите.
Од СДСМ прецизираат дека падот на ВМРО-ДПМНЕ изнесува 135.000 гласови, што е 30,8%. Движење ЗНАМ, пак, паѓа од 56.200 на 38.034 гласови, со што губи 33% од својата поддршка и е етикетирано како најголем губитник.
За разлика од владејачките партии, СДСМ наведува дека тие изгубиле само 18% од гласовите, што, земајќи ја предвид пониската излезеност, речиси и да нема загуба во реална поддршка. Партијата останува втора најсилна политичка опција во земјата.
Во соопштението, СДСМ се осврнува и на опозициската Левица. Според СДСМ, Левица загубила ист процент на гласови како и СДСМ, со мало подобрување на резултатот само на ниво на градот Скопје. Со тоа што Левица сумарно има 2,2 пати помалку гласови од СДСМ, партијата заклучува дека „еуфоричните лаги“ на лидерот на Левица немаат допирна точка со реалноста.
Иако СДСМ се надеваше на подобар резултат, тие го истакнуваат фактот дека разликата помеѓу СДСМ и ВМРО-ДПМНЕ е значително намалена, а драматичниот пад на ЗНАМ укажува на опаѓање на довербата во власта. Партијата најавува дека според анализите, има стабилизација и раст на процентот на освоени гласови во најголем дел од општините, и најавува соодветна анализа и преземање чекори за подобрување на резултатите во општините каде е забележан благ пад.
