СДСМ излезе со остра реакција по рушењето на домот на Владо Малески во Струга, обвинувајќи дека тоа е резултат на „системска незаинтересираност, институционална парализа и политичка неодговорност на власта предводена од ВМРО-ДПМНЕ“.
Од партијата посочуваат дека Управата за заштита на културното наследство не презема ништо и молчи, прашувајќи дали тоа е поради блискост на рушителите со власта или поради служење на политичките и бизнис интереси на ВМРО-ДПМНЕ.
СДСМ бара оставка од министерот за култура, Зоран Љутков, поради, како што велат, неделување и занимавање со партиска кампања, наместо со заштита на културното наследство.
„Владо Малески не е само име од учебник, тој е авторот на текстот на македонската химна, дел од нашата државност и културен идентитет. Рушењето на неговиот дом е удар врз македонската култура, меморија и достоинство“, се вели во реакцијата.
СДСМ бара:
Итна и целосна истрага за случајот.
Одговорност од Управата за заштита на културното наследство.
Оставка од министерот Љутков.
Итна реставрација и заштита на објектите со историско и културно значење во Струга.
Од партијата порачаа дека ова е цивилизациски пад и дека ќе се борат овој срам да не остане неказнет.
