СДСМ ја обвини власта, предводена од ВМРО-ДПМНЕ, дека намерно ја одложила седницата на собраниската Комисија за надзор на АНБ. Според СДСМ, причина за одложувањето е стравот од декласификација на документите, што би можеле да обелоденат милионски криминал.
Од партијата тврдат дека власта намерно ја „утнала“ процедурата за да го одложи заседанието.
„Намерата на власта не е вистината, туку манипулациите, лагите и злоупотребите на институциите“, се вели во соопштението на СДСМ.
Тие ја повикаа власта веднаш да ги декласифицира документите за случајот АНБ, за јавноста да дознае дали премиерот Мицкоски се плаши од докази за криминал на ВМРО-ДПМНЕ. СДСМ заклучува дека власт која не може да организира едно редовно заседание, не може да обезбеди ниту функционален безбедносен систем.
