Социјалдемократскиот сојуз на Македонија (СДСМ) денеска обвини дека владејачката партија ВМРО-ДПМНЕ ја претворила М-НАВ (Македонска навигација) во партиска испостава, со што директно ја загрозува безбедноста на воздушниот сообраќај. Во соопштението за јавност, СДСМ наведува дека институцијата, која е клучна за безбедноста на македонското небо, е исполнета со партиски кадри, роднини и пријатели.
СДСМ посочи на неколку конкретни примери за, како што велат, партизација и непотизам:
- Атанас Стамнов, член на „Патриотскиот институт“ на ВМРО-ДПМНЕ, е вработен без соодветно искуство во воздушниот сообраќај. Неговата сопруга, Анита Стамнова, е директорка на Централниот регистар.
- Братот на претседателот на Управниот одбор, Владимир Ристовски, е активен член на општинскиот комитет на ВМРО-ДПМНЕ во Карпош. Неговиот брат, Александар Ристовски, неодамна е унапреден во М-НАВ.
- Горан Јандреоски е назначен за член на Надзорниот одбор, иако во Црна Гора бил запаметен како „најлош менаџер“.
„Ова е опасна игра на ДПМНЕ со безбедноста на патниците. Секој полет и секое слетување сега минува низ систем каде врските и фамилијарните линии се поважни од знаењето и стручноста“, се вели во соопштението на СДСМ.
Партијата уште еднаш ги повикува ВМРО-ДПМНЕ итно да ги прекинат сите овие вработувања и унапредувања и да ги уважат барањата на синдикатот со цел професионализација на институцијата.
