Полемиката околу инфлацијата во Македонија повторно ги судри владејачките и опозициските партии. По најновите податоци од Државниот завод за статистика, според кои инфлацијата на годишно ниво изнесува 4,8%, СДСМ и ВМРО-ДПМНЕ разменија жестоки обвинувања за тоа кој ја доведе државата до економски раб, а кој навистина се грижи за граѓаните.
Од ВМРО-ДПМНЕ ја обвинија СДСМ дека токму нивната неспособност и лошите економски политики довеле до рекордна инфлација. „Да работеше СДС во интерес на граѓаните и да имаа добри економски политики, немаше инфлацијата да руши европски и светски рекорди“, велат од партијата на Мицкоски.
Дополнително, ВМРО-ДПМНЕ го нападна раководството на СДСМ, обвинувајќи ги Зоран Заев и Венко Филипче за лично богатење, додека, како што тврдат, „над половина милион граѓани преживувале со 150 денари дневно“.
Од „Бихаќка“ возвратија со критики дека ВМРО-ДПМНЕ не нуди решенија, туку само анализи и празни критики. „Владата има готови предлози од СДСМ – нека ги реализира: укинување на ДДВ за храна, зголемување на минималната плата и покачување на платите во другите сектори“, порачаа од СДСМ.
Во одбрана на владините економски политики, од ВМРО-ДПМНЕ посочија на низа мерки што се преземени за поддршка на граѓаните: ограничување на цените и профитните маржи, зголемување на плати и пензии, и финансиска помош за стопанството во износ од 250 милиони евра преку поволни кредити.
Тие се пофалија и со најновата мерка – задолжување на трговците да ги намалат цените на училишниот прибор за најмалку 10% на големо и 15% на мало. Како резултат на активната кампања „Помалку трошоци, повеќе за тебе, се грижиме“, според нив, Владата дејствува со конкретни чекори за заштита на стандардот.
Дополнително, вчера беше потпишан колективен договор за 20% покачување на платите во јавните установи за социјална заштита, а веќе беа зголемени и платите во секторите полиција, здравство, образование, култура и администрација. Од Владата најавуваат и ново покачување на пензиите за над 330.000 пензионери, во вкупен износ од 7.000 денари.
И додека двете страни продолжуваат со меѓусебни обвинувања, граѓаните остануваат во очекување на конкретни резултати и реално подобрување на економската состојба.
