Опозициската партија СДСМ изрази задоволство што по објавувањето на нивната Резолуција со црвените линии, ниту една политичка партија, вклучително и ВМРО-ДПМНЕ, не ги отфрла ниту самите црвени линии, ниту предложените чекори за евроинтеграција.
Од СДСМ нагласуваат дека Резолуцијата е во заеднички национален и државен интерес, бидејќи ги содржи сите неопходни одредници за заштита на македонскиот јазик, идентитет, историја и култура, а истовремено предвидува јасни државни позиции за евроинтегративниот пат.
Во однос на коментарите на премиерот Христијан Мицкоски за наводни „лажни и неточни историски факти“ во текстот, од СДСМ нагласуваат дека такво нешто во Резолуцијата нема.
Напротив, велат од партијата, во неа се вградени прецизно, фактографски и историски, сите претходни резолуции и историски датуми поврзани со прогресот кон Европската Унија.
„Порачуваме дебатата на оваа тема во иднина да продолжи конструктивно – на никој не му оди во прилог да се извртуваат тезите или да се укажува на неточности кои реално не постојат“, порачуваат од СДСМ.
Партијата уште еднаш ја истакна својата отвореност за сите конструктивни забелешки од партиите и сите политички чинители, повикувајќи на национален консензус.
„Време е конечно да изградиме национален консензус во интерес на сите граѓани и да покажеме зрелост дека партиите може да соработуваат кога се во прашање повисоки цели и иднината на државата. СДСМ е подготвен на тоа“, заклучуваат од опозициската партија.
