Социјалдемократскиот сојуз на Македонија (СДСМ) издаде соопштение за јавност во кое го обвинува министерот за внатрешни работи, Панче Тошковски, за злоупотреба на институциите во партиски цели, тврдејќи дека тој и полициски инспектор присуствувале на партиски состанок на ВМРО-ДПМНЕ во Кривогаштани.
Според СДСМ, на партискиот состанок за изборите присуствувал и полицискиот инспектор при ОВР Прилеп, Сашо Јосифоски, што претставува директно кршење на Законот за внатрешни работи.
СДСМ обвинува дека „партизираната полиција на Тошковски е целосно ставена во функција на ВМРО-ДПМНЕ“ наместо на изборниот процес, што претставува „флагрантна злоупотреба“.
„Министерот Тошковски, наместо да гарантира независност и професионалност на полициските структури, ја претвора полицијата во сервис на ВМРО-ДПМНЕ“, се вели во соопштението.
СДСМ бара разрешување на полицискиот инспектор Јосифоски, суспензија, поведување дисциплинска постапка и одговорност од министерот Тошковски.
Од партијата порачуваат дека полицијата мора да биде во служба на граѓаните, а не во служба на ДПМНЕ, предупредувајќи дека јавноста веќе еднаш видела што значи партизирана полиција – притисоци, закани и злоупотреби во изборен процес, и дека тоа нема да се дозволи повторно.
