Опозициската партија СДСМ денеска ја обвини министерката за образование, Весна Јаневска, дека манипулирала со јавноста во врска со обезбедувањето учебници за новата учебна година.
Според соопштението, Јаневска најпрво тврдела дека „сè е подготвено и учебници ќе има за сите“, а потоа под притисок на јавноста конечно ја признала вистината – дека учебници за сите ученици нема.
СДСМ ја критикува министерката дека наместо да работи на подобрување на условите во образованието, води постојана изборна кампања, додека реалноста е сосема спротивна.
„Децата на почетокот на учебната година немаат сите учебници, наставниците работат во сè потешки услови“, се вели во соопштението на партијата.
Од СДСМ истакнуваат дека власта потрошила 11 милиони евра за учебници, но учениците од осмо одделение сè уште немаат учебници по клучни предмети како математика, историја, хемија, физика и странски јазици. Поради ова, партијата смета дека Јаневска треба да си поднесе оставка, бидејќи „не е способна да го води ресорот“.
