Социјалдемократскиот сојуз на Македонија (СДСМ) денеска одржа прес-конференција на која ги обвини локалните власти на ВМРО-ДПМНЕ за „четири години разочарувања“, наместо за развој и проекти. Според СДСМ, општините се претворени во „епицентар на тендерски шеми“ и партиски злоупотреби.
СДСМ тврди дека исти фирми блиски до власта добиваат милионски тендери и често се јавуваат како единствени понудувачи, што го нарекуваат „корупција во најчиста форма“.
Од СДСМ посочуваат дека локалните власти предводени од ВМРО-ДПМНЕ ги зголемиле цените на комуналните услуги како вода, канализација и смет, како и данокот на промет, во повеќе општини низ земјава.
Според СДСМ, општините под управа на ВМРО-ДПМНЕ се соочуваат со „срамна слика“: нечисти улици, сообраќаен хаос и недостаток на сериозни инфраструктурни проекти. Како најголем пример се наведува Скопје, каде СДСМ тврди дека владее хаос во јавниот превоз, јавните претпријатија се пред распад, а има и над 150 незаконски дивоградби.
Партијата истакна дека ниту едно од клучните ветувања на ВМРО-ДПМНЕ, како што е бесплатниот градски превоз во Скопје, не е исполнето.
На крајот од своето обраќање, СДСМ ги повика граѓаните локалните избори да ги искористат како шанса да се стави крај на „хаосот, нереализираните ветувања, урбаната мафија и криминалот“ и да се вратат општините во служба на граѓаните.
