Светската здравствена организација (СЗО) и Обединетите нации (ОН), на денешниот Светски ден на менталното здравје – 10 октомври, алармираа за итната потреба од засилена помош и психосоцијална поддршка за луѓето погодени од хуманитарни кризи, воени конфликти и природни катастрофи. Овогодишната тема е фокусирана токму на ова: „Пристап до услуги – ментално здравје при катастрофи и вонредни состојби“.
СЗО уште еднаш потенцира дека „нема здравје без ментално здравје“, нагласувајќи ја суштинската улога на менталната благосостојба во целокупното здравје.
Според податоците објавени по повод Денот, кој СЗО го основа во 1992 година за подигнување на глобалната свест, вонредните состојби имаат драматично влијание врз психата на луѓето. Податоците покажуваат дека „едно од пет лица (22 проценти) кои доживеале воени конфликти во претходните 10 години имаат депресија, анксиозност, посттрауматско стресно нарушување, биполарно нарушување или шизофренија“.
Поединците со посериозни ментални нарушувања, како и постарите лица и жените, се особено подложни во овие ситуации. Појавата на криза значително го отежнува давањето на услуги за ментално здравје и ја намалува достапноста до квалитетна здравствена грижа.
СЗО, исто така, нагласува дека и професионалците кои први даваат помош во екстремни околности се под огромен притисок и имаат потреба од стручна помош и поддршка за сопственото ментално здравје.
„Поддршката на менталната благосостојба на поединците за време на кризи не е само важна – таа спасува животи и им дава сила на луѓето да се справат со предизвиците“, се вели во пораката на СЗО.
Меѓународните насоки препорачуваат достапноста на услугите за ментално здравје и психосоцијална поддршка да се движи од самопомош во заедницата и психолошка прва помош до клиничко лекување.
