Сите службени возила во Македонија ќе мора да бидат обележани со нови црвени регистарски таблички, соопшти директорот на Службата за општи и заеднички работи на Владата (СОЗР), Ивица Томовски.
Институциите имаат рок до 15 септември да го спроведат брендирањето, а доколку не го сторат тоа, ќе следува и трет, последен рок до 29 септември.
„Доколку некој се обиде да избегне брендирање, кога ќе му дојде време за регистрација, сепак ќе ги добие овие таблици“, изјави Томовски.
Новото правило ги опфаќа сите возила во државна сопственост – од владините и општинските, до оние на јавните претпријатија. Исклучок ќе биде направен за дел од возилата на МВР и АНБ.
Точниот број на службени возила во земјата не е познат, но се проценува дека се движи меѓу 7.000 и 7.500.
„Ќе оставиме простор до понеделник сите институции да се огласат и да информираат за постапката“, додаде Томовски.
