Генерал-потполковник Џефри Круз, шеф на Агенцијата за воено разузнавање на САД (ДИА), е разрешен од функцијата, потврди потпретседателот на Сенатскиот комитет за разузнавање, Марк Ворнер.
Сенаторот Ворнер ја оцени смената како дел од „опасната навика на администрацијата на Трамп да ги подложува разузнавачките информации на тест за лојалност“.
Контрадикторни извештаи за Иран како можна причина
Иако причините за разрешувањето на Круз не се официјално објавени, се претпоставува дека тоа е поврзано со неодамнешен извештај на ДИА. Агенцијата за воено разузнавање процени дека американските воздушни напади врз иранските нуклеарни локации на 22 јуни ја одложиле програмата на Техеран за само неколку месеци. Оваа проценка е во директна спротивност со тврдењето на претседателот Трамп дека целите биле „уништени“.
Белата куќа ја осуди проценката на ДИА како „тотално погрешна“, а Трамп ги нападна медиумите што ја објавија информацијата, нарекувајќи ги „наркомани“ и „пренесувачи на лажни вести“.
Продолжуваат смените во американските разузнавачки служби
Разрешувањето на Круз е дел од серијата смени во безбедносниот сектор. Во април, Трамп го отстрани директорот на Националната агенција за безбедност (NSA), Тимоти Хау, како дел од чистката што опфати повеќе од десетина членови на Националниот совет за безбедност на Белата куќа.
Пред неколку дена, директорката на националното разузнавање, Тулси Габард, најави дека се поништува пристапот до класифицирани информации за 37 сегашни и поранешни разузнавачки службеници и дека ќе се намали персоналот во нејзината агенција за 40% почнувајќи од 1 октомври. Администрацијата на Трамп ги правда овие мерки со напорите за намалување на владиниот персонал и сузбивање на, како што ја опишуваат, „политизацијата“ на разузнавањето.
