Собранието на Република Македонија утре ќе расправа по предлогот на Владата за именување на Азир Алиу за нов министер за здравство. Седницата, која е закажана како 54. по ред, ќе го опфати и предлогот за именување на Албрим Хоџа за заменик-министер за земјоделство, шумарство и водостопанство.
Предлогот за Алиу е доставен од премиерот Христијан Мицкоски и содржи детална биографија. Според доставеното, Алиу е дипломиран електроинженер, доктор по информатички науки и редовен професор на Факултетот за компјутерски науки и технологии при Универзитетот на ЈИЕ во Тетово. Во своето досегашно политичко искуство, тој беше министер за информатичко општество и администрација во 2023 и 2024 година, а зад себе има и други раководни позиции.
Премиерот Мицкоски изрази очекување за добра соработка со Алиу во новата владина постава. Поддршка за неговото именување даде и првиот вицепремиер и министер за животна средина, Изет Меџити, кој го оцени Алиу како „најсоодветен кандидат“, истакнувајќи дека здравството има потреба од искусен менаџер кој ќе го познава системот и ќе работи на негово унапредување.
Алиу е кадар на Алијансата за Албанците – политичка партија која остана во коалицијата „Вреди“, и по оставката на нејзиниот поранешен претседател Арбен Таравари на 15 мај, кој се повлече од Владата и премина во опозиција.
Во истата седница ќе се разгледува и предлогот за именување на Албрим Хоџа за заменик-министер за земјоделство. Хоџа е новинар по професија, со диплома од Правниот факултет при Државниот универзитет во Тетово и долгогодишно искуство во медиумите.
