Вечерва во Кинотеката на Македонија ќе се одржи специјална проекција на дигитално реставрираниот македонски филмски класик „Македонска крвава свадба“, снимен во 1967 година во режија на Трајче Попов. Проекцијата започнува во 20 часот.
Овој настан е дел од европскиот проект „Сезона на филмски класици“ (A Season of Classic Films), иницијатива на Асоцијацијата на европски кинотеки (ACE), поддржана од програмата „Креативна Европа“ – МЕДИА.
Кинотеката нагласува дека оваа проекција е посебно значајна бидејќи ѝ овозможува на домашната публика повторно да го доживее филмот во неговата обновена, дигитално реставрирана верзија, а на младите генерации да се запознаат со еден од најрепрезентативните примери на македонската филмска традиција.
Со цел да се обезбеди што поширока достапност, филмот во исто време ќе биде емитуван во живо преку Јутуб каналот на Кинотеката, со што ќе може да го проследи и публиката надвор од Скопје и Македонија.
Во рамки на проектот „Сезона на филмски класици“, Кинотеката досега ги дигитализираше и дигитално ги реставрираше филмовите:
- Долгометражни филмови: „Мирно лето“, „Фросина“, „Мементо“ и „Мис Стон“.
- Кратки етнолошки филмови: „Мариовска свадба“, „Велигденски обичаи“ и „Русалиски обичаи“.
„Македонска крвава свадба“ е еден од над 40 новореставрирани филмски дела кои се претставуваат годинава низ програмата на ACE. Проектот, од своето основање, овозможи реставрација и повторна дистрибуција на над 210 европски филмови, со што се негува и промовира филмското наследство.
