Жарко Стеваноски, кандидат за советник во општина Прилеп од Левица, упати остра критика кон состојбата во државата, наведувајќи дека „патриотски ја уништуваме иднината“ поради преголемата државна администрација и апатијата кај граѓаните.
Стеваноски ја проблематизира бројноста на администрацијата: „Во држава со популација од 1.800.000 жители, од близу 180.000 администрација, секој од нив со по 4 члено семејство и од минимум уште толку, кои навиваат за следното работно место од поблиското семејство во државните јасли, ние очекуваме резултати кои ќе значат пресврт во државното управување?“
Тој истакна дека вредните деца не чекале милостина од државата и неповратно заминале од земјата, додека оние кои останале се тивки и не гледаат мотив да се вклучат во промени, бидејќи секоја промена е „партиска, искварена“.
Стеваноски упати срам кон возрасните кои молчат: „Срам да им е на возрасните кои сето ова го гледаат и молчат, на оние кои се гласни само за линеарно покачените пензии и на оние кои џаболебарошат на државна сметка, на штета на идните генерации.“
Тој предупреди дека повторно се наговестува „репете“ – истото мени со истите неостварени 34-годишни ветувања: „Келнерите се менуваат а ние повторно ќе ја сркаме истата чорба.“
