По пожарот што сериозно го оштети, Стопанската комора на Македонија закажа состанок за петок, 12 септември 2025 година, со раководителите на синџирите на маркети. Целта на состанокот е да се договори кампања за засилена продажба на производите на „Макпрогрес“, со цел да се обезбеди опстанок на фабриката и да се задржат сите вработени.
Состанокот ќе го води претседателот на Комората, Бранко Азески. На него ќе присуствува и првиот човек на „Макпрогрес“, Глигор Цветанов, кој лично ќе го презентира концептот за идното работење на компанијата.
„Макпрогрес“ е производител на познати брендови како „Винчини“, „Сончева Долина“, „Натура“, „Дониа“ и „Фантазиа“, а произведува и за приватни трговски марки на водечките маркети во земјата.
Според Стопанската комора, големата поддршка од јавноста и на социјалните мрежи, која се јави по немилиот настан, ја потврдува важноста на „Макпрогрес“ како домашен македонски бренд.
